భక్తజన సంద్రంతో వెల్లివిరిసిన ముక్కోటి వైకుంఠ ఏకాదశి
శ్రీ వెంకటేశ్వర స్వామి ఆలయంలో ఉత్తర ద్వార దర్శనానికి పోటెత్తిన భక్తులు
జడ్చర్ల రూరల్, డిసెంబరు 30 (మనఊరు ప్రతినిధి): పట్టణంలోని శ్రీ శ్రీ శ్రీ వెంకటేశ్వర స్వామి దేవాలయంలో ముక్కోటి వైకుంఠ ఏకాదశి వేడుకలు భక్తిశ్రద్ధలతో ఘనంగా నిర్వహించబడ్డాయి. ఈ పవిత్ర సందర్భంగా స్వామివారి ఉత్తర ద్వార దర్శనం కోసం తెల్లవారుజామునుంచే భక్తులు పెద్ద సంఖ్యలో ఆలయానికి తరలివచ్చారు. ఈ పవిత్ర రోజున మునిసిపల్ చైర్పర్సన్ కోనేటి పుష్శలత, వైస్ చైర్పర్సన్ పాలాది సారికతో పాటు పలువురు కౌన్సిలర్లు స్వామివారికి ప్రత్యేక పూజలు నిర్వహించారు. అనంతరం ఉత్తర ద్వారం గుండా స్వామివారి దర్శనం చేసుకుని పట్టణ ప్రజల సుఖసంతోషాలు, అభివృద్ధి కోసం ప్రార్థనలు చేశారు. ప్రత్యేక అలంకరణలతో స్వామివారిని దర్శించుకున్న భక్తులు పూజలు, అభిషేకాలు నిర్వహించి తమ మొక్కులు చెల్లించుకున్నారు. ఆలయ ప్రాంగణమంతా భక్తి నామస్మరణతో మార్మోగింది. ఆలయ కమిటీ ఆధ్వర్యంలో ప్రత్యేక క్యూలైన్లు, ప్రసాద పంపిణీ ఏర్పాట్లు చేపట్టగా, ఎలాంటి అసౌకర్యాలు కలగకుండా పోలీసులు, వాలంటీర్లు భద్రతా చర్యలు తీసుకున్నారు. ముక్కోటి వైకుంఠ ఏకాదశి సందర్భంగా స్వామివారి ఉత్తర ద్వార దర్శనం లభించడం వల్ల పాప విమోచనం కలుగుతుందని భక్తులు విశ్వసిస్తూ, ఈ పవిత్ర ఘడియలను ఆధ్యాత్మిక ఆనందంతో అనుభవించారు.
