పోలీసుల కళ్లుకప్పి పరారైన అంతర్రాష్ట్ర దొంగ నాగిరెడ్డి అరెస్ట్
రెండు నెలల తర్వాత దొరికిన దొంగ నాగిరెడ్డి
కల్వకుర్తి రూరల్, జనవరి 7 (మనఊరు ప్రతినిధి): కల్వకుర్తి పోలీస్ స్టేషన్లో గతేడాది నవంబర్ 13న విచారణ సమయంలో పోలీసుల కళ్లుకప్పి పరారైన అంతర్రాష్ట్ర దొంగ తెలుగు నాగిరెడ్డి అలియాస్ నాగిరెడ్డిని ఎట్టకేలకు పోలీసులు అదుపులోకి తీసుకున్నారు. చోరీలకు పాల్పడుతూ వివిధ రాష్ట్రాల్లో తిరుగుతున్న నాగిరెడ్డిని విచారణ నిమిత్తం కల్వకుర్తి పోలీసులు అప్పట్లో అదుపులోకి తీసుకున్నారు. అయితే మలవిసర్జనకు వెళ్తున్నానని చెప్పి మరుగుదొడ్డి నుంచి గోడ దూకి పరారయ్యాడు. ఈ ఘటన అప్పట్లో తీవ్ర విమర్శలకు దారితీసింది. దాదాపు రెండు నెలలుగా పోలీసులను ముప్పు తిప్పలు పెట్టిన ఈ దొంగను, మల్కాజ్గిరి సీసీఎస్ సీఐ జిలేందర్ రెడ్డి నేతృత్వంలోని ప్రత్యేక బృందం మంగళవారం రాత్రి హైదరాబాద్లోని సరూర్నగర్ ప్రాంతంలో తన ప్రియురాలితో కలిసి ఉంటున్న సమయంలో పట్టుకుంది. అనంతరం నిందితుడిని కల్వకుర్తి పోలీసులకు అప్పగించారు. పరారీలో ఉన్న నిందితుడు పట్టుబడటంతో కల్వకుర్తి పోలీసులు ఊపిరి పీల్చుకున్నారు. నాగిరెడ్డిపై కల్వకుర్తి పరిధిలోనే ఆరు కేసులు ఉన్నట్లు సమాచారం. కాగా, నిందితుడు పరారవ్వడానికి పోలీసుల నిర్లక్ష్యమే కారణమంటూ అప్పట్లో ఉన్నతాధికారులు సంబంధిత సిబ్బందిపై శాఖాపరమైన చర్యలు తీసుకున్న విషయం తెలిసిందే.
